کسانوں کا دہلی مارچ ملتوی

دہلی چلو مارچ ملتوی ،پولیس نے آنسو گیس کے گولے داغے ،چھ کسان زخمی

پانی پت (ہریانہ)شمبھو بارڈر اور کھنوری بارڈر پر کئ مہینہ سے دھرنے پر براجمان کسان تنظیموں نے ایم ایس پی پر قانون بنانے کا مطالبہ کرتے ہوئے چھ دسمبر کو دہلی چلو کی کال دی تھی۔ اسی کے تحت تنظیم سے وابستہ ١٠٠ ارکان جمعہ کی دوپہر ایک بجے شمبھو بارڈر پارکرنے کی کوشش کی، تو ہریانہ پولیس نے کسانوں پر آنسو گیس کے گولے داغے،جس سے کئ کسانوں کے زخمی ہونے کی خبر ہے۔شروع میں کسانوں نے رکاوٹیں ہٹادیں،تار بھی اکھاڑ دیے،کسان جیسے ہی پنجاب کی سرحد سے ہریانہ کی طرف کوچ کے لیے بڑھے تو پولیس نے دہلی کوچ کا اجازت نامہ طلب کیا،جو ان کے پاس نہیں تھا۔اس سے پہلے کروکشیتر میں کسانوں کے دہلی کوچ کو لے کر پنجاب کے ساتھ ملحق پیہوا علاقہ کی سرحد پر کسانوں کو روکنے کے لیے پولس میں ہلچل مچ گئی ہے۔ حالانکہ اب امن ہے اور کسان بھی نہیں پہنچے ہیں لیکن پولیس چوکس ہے۔ ضرورت پڑنے پر کسانوں کو روکنے کے لیے سیمنٹ کی دیوار بنانے کا میٹریل بھی سرحد کے قریب رکھ دیا گیا ہے جب کہ یہاں ٢٠٠ پولیس اہلکار تعینات کرنے کے احکامات جاری کیے گئے ہیں۔ اس وقت کھنوری بارڈر پر بھی امن ہے۔ ابھی تک کسانوں کا کوئی گروپ سرحد کی طرف نہیں آیا ہے۔ سرحد پر نیم فوجی دستے اور پولیس اہلکار تعینات ہیں۔

گہلہ چیکہ میں سخت سکیورٹی

پنجاب بارڈر پر گہلا چیکا پر سڑک کو تاحال بند نہیں کیا گیا تاہم سیکیورٹی کے سخت انتظامات کیے گئے ہیں۔ کسانوں کے دہلی مارچ کو لے کر ضلع انتظامیہ چوکس ہے۔ ٢٠٢١ میں کسانوں کی تحریک کے دوران گہلا کی سرحدوں سے کسان دہلی گئے تھے۔ ادھر انتظامیہ نے ضلع میں دفعہ ١٦٣ بھی نافذ کر دی ہے۔ گہلا چیکا میں پٹیالہ روڈ پر واقع تاتیانہ بارڈر پر پولس انتظامیہ کی جانب سے بیریکیڈنگ کی گئی ہے۔ ڈی ایس پی کلدیپ بینیوال خود صورتحال پر نظر رکھے ہوئے ہیں۔ بینیوال نے کہا کہ حکومت کے احکامات کے تحت سرحد پر سیکورٹی کے سخت انتظامات کئے گئے ہیں۔ کسی بھی صورت میں کسانوں کو ٹریکٹر لانے اور سرحد پر مظاہرہ کرنے کی اجازت نہیں دی جائے گی۔

دہلی اور ہریانہ پولیس کسانوں کے دہلی مارچ کو لے کر چوکس ہوگئی ہے۔ بہادر گڑھ کے تھانوں میں پولیس اہلکاروں کو اسٹینڈ بائی پر رکھا گیا ہے۔ دہلی پولیس کے جوان بھی سرحد پر تعینات ہیں۔ ٹکری بارڈر پر لوہے کے بڑے کنٹینر لائے گئے ہیں۔ کنٹینرز کو سائیڈ پر محفوظ کر دیا گیا ہے۔ لوہے اور سیمنٹ سے بنے بیریکیڈز بھی تیار ہیں۔ کسانوں کے آنے پر دہلی کا راستہ بند کرنے کی تیاریاں کی جا رہی ہیں۔ فی الحال دونوں طرف سے ٹریفک معمول پر ہے۔

انبالہ میں انٹرنیٹ خدمات بند

کسانوں کی تحریک کے پیش نظر انبالہ میں انٹرنیٹ خدمات بند کر دی گئی ہیں۔ انبالہ کے ڈانگ ڈیہری، لوہ گڑھ، مانک پور، ڈڈیانہ، باری گھیل، لہرسہ، کالو ماجرا، دیوی نگر، سدوپور، سلطان پور اور ککرو جیسے دیہات میں موبائل انٹرنیٹ سروس ٩ دسمبر تک بند رہے گی۔

اب کسان دہلی کی طرف مارچ کرنے پر بضد ہیں۔ انھوں نے جلدی آگے کی حکمت عملی کے خاکہ تیار کرنے کا اعلان کیا ہے ۔دوسری طرف ہریانہ پولیس کہہ رہی ہے کہ کسانوں کو پہلے دہلی پولیس سے اجازت لینی چاہیے۔ ذہن نشین رہے کہ پولیس کی جانب سے کسانوں پر آنسو گیس کے گولے چھوڑے گئے ہیں۔ پولیس نے بیریکیڈ پر لگی جالی ہٹانے کے بعد کارروائی کی۔ پنجاب-ہریانہ کے شمبھو بارڈر پر بیٹھے کسانوں کو آج دہلی کی طرف مارچ کرنا تھا۔ دوپہر تقریباً ایک بجے ١٠١ کسانوں کا ایک گروپ دہلی کی طرف روانہ ہوا۔ کسانوں نے رکاوٹیں اور خاردار تاریں ہٹا دیں لیکن ہریانہ پولیس نے انہیں سرحد پار کرنے کی اجازت نہیں دی۔ کافی دیر تک کسان بیریکیڈنگ کے سامنے کھڑے رہے اور کہتے رہے کہ وہ پیدل جانا چاہتے ہیں۔ شمبھو بارڈر پر کسان لیڈر سرون سنگھ پنڈیر نے کہا کہ اب 101 کسانوں کا ایک گروپ ٨دسمبر کو دوپہر ١٢ بجے دہلی کی طرف مارچ کرے گا۔ مرکزی حکومت سے بات چیت کے لیے کل طے کیاگیا ہے۔ انہوں نے کہا ہے کہ مذاکرات کے لیے تیار ہیں، کل تک انتظار کریں گے۔ ہم حکومت سے تصادم نہیں چاہتے۔

اسی وقت، پولیس نے کہا کہ کسانوں کو صرف اس صورت میں آگے بڑھنے کی اجازت دی جائے گی جب وہ دہلی پولیس سے اجازت لے کر آئیں۔ کسانوں کی تحریک کے پیش نظر انبالہ میں انٹرنیٹ خدمات بند کر دی گئی ہیں۔

بتایا جاتا ہے کہ اسی دوران ایک کسان بیریکیڈنگ پر بنے شیڈ پر چڑھ گیا۔ پولیس نے اسے وارننگ دی اور نیچے لے آئی۔ اس سے قبل جب کچھ کسان لوہے کی گرل پر چڑھے تو ان پر سپرے کیا گیا جس سے آنکھوں میں جلن ہو رہی ہے۔ کسانوں کے مطابق سپرے میں مرچ تھی۔

ہریانہ پولیس کی جانب سے ٢٦ سے زیادہ آنسو گیس کے گولے داغے گئے۔ ہریانہ پولیس کی طرف سے پلاسٹک کی گولیاں بھی چلائی گئیں۔ چھ کسان زخمی ہوئے ہیں۔